برطانوی وزیراعظم کیئر اسٹارمر اور امریکی صدر ڈونلڈ ٹرمپ کے درمیان اہم ٹیلیفونک گفتگو ہوئی، جس میں دونوں رہنماؤں نے روس–یوکرین تنازع کے سفارتی حل پر اتفاق کیا۔ دونوں ممالک نے اس بات پر زور دیا کہ جنگ کا خاتمہ صرف مذاکرات اور پائیدار امن حکمتِ عملی سے ہی ممکن ہے۔
گفتگو کے دوران وزیراعظم کیئر اسٹارمر نے واضح کہا کہ برطانیہ یوکرین کی خودمختاری اور علاقائی سالمیت کی مکمل حمایت کرتا ہے۔انہوں نے یہ بھی بتایا کہ لندن کی خواہش ہے کہ جلد از جلد ایسا امن معاہدہ سامنے آئے جو خطے میں مستقل استحکام لائے۔
صدر ٹرمپ نے اپنے مؤقف کا اعادہ کرتے ہوئے کہا کہ امریکا خطے میں قابلِ قبول، محفوظ اور دیرپا امن کے لیے سنجیدہ ہے۔انہوں نے اس بات پر زور دیا کہ امریکا اور برطانیہ مل کر ایسا سفارتی راستہ نکال سکتے ہیں جو فریقین کے لیے بہتر ثابت ہو۔
دونوں رہنماؤں نے یوکرین کے لیے مشترکہ امن منصوبے پر مشاورت تیز کرنے پر اتفاق کیا اور اس بات پر بھی گفتگو کی کہ عالمی برادری اس مسئلے کے حل میں مزید مؤثر کردار ادا کرے۔
بین الاقوامی تجزیہ کاروں کا کہنا ہے کہ امریکا اور برطانیہ کا مشترکہ موقف تنازع کے سیاسی حل کی طرف ایک مثبت پیشرفت ہے، جس سے مذاکرات کی راہ ہموار ہونے کی امید پیدا ہو گئی ہے۔
